Безвременската убавина на италијанскиот крајбрежен град Амалфи на југо-запад ги одушевува бројните туристи и трагачи за совршено место за одмор. Планинските клисури се спуштаат сè до морето и создаваат еден магнетски привлечен пејзаж каде што може да го пронајдете вашето место под сонце. Суперлативите кои најдобро го опишуваат овој дел од Италија ги препозна и УНЕСКО, кој го прогласи местото за заштитена светска градина.
Токму на ова место се наоѓа еден идеален хотел, Санта Катерина, кој е изграден на неколку минути возење од градот. Историјата на ресортот е исто толку импресивна како и неговото природно окружување. Оригиналната конструкција е направена уште во 1880 година, а реставрацијата во 1904 година.
Денес ова популарно место за одмор брои 70 соби, при што повеќето имаат поглед кон морето. Освен зелените градини, хотелот има и отворен базен со поглед кон морето, каде што бројните хедонисти може да уживаат со часови.
Во хотелот има врвен ресторан каде што секојдневно се нудат медитерански специјалитети, клуб на плажа за попладневни коктели, како и богат wellness клуб за масажа или посета на сауна.