Војводата и војвотката од Сасекс денес добија син.
Меган Маркл беше пренесена во болница во текот на утринските часови, а Бакингемската палата сега и официјално потврди дека на свет донела здраво машко дете.
Принцот Хари со задоволство ја сподели среќната вест со светот.
-Многу сум возбуден што можам да споделам дека со Меган ова утро добивме син, едно мошне здраво момче. Горд сум на својата сопруга, изјави тој.
Принцот додаде дека иако Маркл требало да се породи уште минатата недела, сè поминало во најдобар ред.
-Мајката и бебето се одлично. Ова беше најневеројатното искуство кое што би можел да си го замислам. Како жената го прави она што го прави просто е неразбирливо, но ние сме апсолутно воодушевени и толку благодарни за целата љубов и поддршка од сите, додаде Хари.
Што се однесува до името на новороденчето, војводата откри дека допрва треба да одлучат.