Легендата на српската и југословенска глума, Велимир Бата Живојиновиќ почина синоќа на возраст од 82 години во болницата Света Сава во Белград, јавија српските медиуми.
На Живојиновиќ на почетоков на месец мај му беше ампутирана ногата и по серијата здравствени проблеми почина синоќа во 22.45 часот во Белград.
Актерот кон крајот на животот се бореше со серија на здравствени проблеми, како мозочен удар, срцеви проблеми и гангрена на ногата поради која замина на третман во Куба.
Бата Живојиновиќ уживаше во долга и плодна кариера не само на филм, туку и на телевизија, а и на театарските штици. Своето филмско деби го имаше во 1955-та година со филмот Pesma sa Kumbare, а дел од најпознатите филмски улоги тој ги оствари во филмовите како Валтер го брани Сарајево, Битката на Неретва, Битката на Сутјеска...
Живојиновиќ во 60-те и 70-те беше дел од повеќе филмови во холивудска и европска продукција, а во 80-те и 90-те беше присутен и на малите екрани со култните серии како Бољи живот и Срећни људи.
Семејството на Живојиновиќ не објави детали поврзани со датата за одржување на погребот.