„Доза среќа“ (A Dose Of Happiness), најгледаната современа драма во Бугарија во последните 30 години, снимена според вистинска приказна за дрогата, падот, стравот и спасението, е достапна во понудата на HBO GО, а следниот термин на прикажување на HBO каналот е 9. јуни во 22:00 часот.
„Доза среќа“ е биографски филм за новинарката Весела Тотева чиј лик го игра нејзината ќерка Валентина Каролева. Дејствието на филмот се одвива во текот на 90-тите години на минатиот век во време кога дрогата станува широко достапна во Бугарија. Ова е приказна за потрагата по среќа, но и пронаоѓањето на пеколот затоа што среќата, како и ѓаволот, има многу лица. Љубовната приказна на Весела Тотева не само што го менува нејзиниот живот од корен, туку и го уништува. Сепак, нејзиното семејство е секогаш со неа, особено во најтешките моменти.
Филмот е снимен според романот „Пад и спасение: Исповед на една зависничка“ (2016) во кој ја опишува исцрпувачката и успешна седумгодишна борба со зависноста од дрога. Весела Тотева била консултант за време на снимањето на филмот, но ненадејно починала шест месеци пред премиерата, на 4. март 2019 година.
Режисерка е младата Јана Титова која на премиерата изјави:
-Сакавме да снимиме убав и инспиративен филм за да пренесеме порака полна со надеж која ќе покаже дека спасението е возможно. Во исто време целта ни беше да ги информираме родителите и тинејџерите за последиците од зависностите. Од моментот кога започнавме да се занимаваме со приказната за Весела Тотева знаевме дека тоа нема да биде само филм туку и наша мисија. Нашиот фокус беше насочен кон тоа филмот да дојде до меѓународната публика затоа што оваа мултикултурна приказна сака да ги менува животите.