Новата HBO серија „Лавкрафтовата земја“ (Lovecraft Country), базирана на истоимениот роман на Мет Раф од 2016 година, ќе има премиера на 17. август во 20 часот на HBO каналот, а истиот ден доаѓа и во понудата на HBO GO услугата.
Во текот на десетте епизоди серијата го следи Атикус Фримен, млад воен ветеран кој ужива во книги со научно-фантастична содржина. По враќањето од Втората светска војна, неговото семејство ќе биде вовлечено во мистериозна ситуација полна со магија и тајни секти. Атикус, заедно со неговата другарка Летиша и вујкото Џорџ, заминува на патување низ Америка во потрага по неговиот исчезнат татко. Патувањето станува борба за преживување и совладување на расистичките проблеми на белата Америка, но и страшните чудовишта од романите на Лавкрафт.
Во главните улоги ги гледаме Џонатан Мејџорс, Џурни Смолет-Бел, Анџино Елис, Аби Ли, Џада Харис, Вунми Мосаку и Мајкл Кенет Вилијамс. Во епизодните улоги настапуваат Кортни Б. Венс, Џејми Чунг, Џејми Њуман, Џордан Патрик Смит и Тони Голдвин.
Извршни продуценти на серијата се Миша Грин, Џ.Џ. Абрамс, Џордан Пил, Бил Караро, Јан Деманж, Даниел Сакхајм и Дејвид Кнолер. Миша Грин е и сценаристка на серијата.