Телеком ја вети најголемата забава во градот и го исполни ветувањето. Порта Македонија вчеравечер се претвори во центарот на сите случувања благодарение на музичката програма што беше подготвена за големиот музички спектакл.
Забавата ја започна Каролина со песните од последниот албум „Македонско девојче“.
Публиката во еден глас со неа ги пееше стиховите на „Две лири“ , „Ружа Ружица“, „Пролет лето есен зима“ и ред други хитови, додека Гочева со својот префинет стил и моќен глас блескаше на сцената.
По неа следуваше вистинско „откачување“ со хрватската поп атракција, Северина Вучковиќ.
Неверојатна секси појава, висока потпетица и Севе стисна на гасот подигнувајќи ја атмосферата на едно сосема поинакво ниво. Жената која зад себе има 25-годишна кариера предизвика еуфорија во центарот на Скопје.
Нејзината харизма ги натера и најуморните да заиграат во ритамот на нејзините песни, а за награда оние кои се најдоа најблизу до сцената ја добија наметката и прстените кои пејачката ги фрли во публиката.
Сакаме да признаеме или не, хрватската дива е шоумен кој ќе измами насмевка и кај најголемите скептици.
Крајот на вечерта беше резервиран за светскиот DJ, Дејвид Моралес. Неговите сетови ја забавуваа публиката до два часот по полноќ, претворајќи го центарот на градот во клуб на отворено.
Текст и фото: Н.В/А.Ш