Тејлор е подготвена малку да забави, со оглед на многубројните ангажмани кои ги имаше пејачката, вклучувајќи ја и турнејата „1989“ која започна во декември минатата година, а се уште трае. Сепак, во едно интервју за британскиот музички магазин NME, пејачката истакна дека воопшто не се брза и дека и треба време малку да одмори.
- Мислам дека треба да паузирам некое време, па и луѓето да одморат од мене. Ќе правам...не знам што, ќе се дружам со пријателите, ќе пишувам нови песни, изјавила пејачката.
Нејзиниот албум беше на врвот на најпродавани албуми во 2014 година, од кој произлегоа пет хитови, вклучувајќи ја и песната номинирана за Grammy – „Shake It Off“ и песната „Bad Blood“ која ја зема MTV VMA наградата. И можеби токму поради напорниот период, Тејлор не чувствува притисок за да достигне исто ваква популарност и со следниот албум, но смета дека треба да проба нешто ново.
- Секој ден ме има во вестите и тоа за различни причини. И понекогаш се чувствува огромна напнатост поради тоа. Тогаш често знам да и се јавам на мајка ми и да зборуваме со часови, за да се потсетам на сите други добри работи, додава Тејлор.
Дури и ако Тејлор одлучи дека е време да се оддалечи од музичката индустрија, обожавателите ќе може да ги слушаат нивните омилени песни, додека да пристигне новиот материјал.