Синоќа се одржаа Британските музички награди, каде што кралица на вечерта беше единствената Адел, која си однесе дома вкупно четири награди. Таа ги собра наградите за најдобар британски артист, најдобар албум, глобален успех, како и за најдобра британска песна, за песната „When We Were Young“.
- Навистина ми значи да се вратам после толку време и да ме пречекате вака топло, изјави Адел во нејзиниот говор, во кој не успеа да се воздржи, а да не пушти солза.
На шоуто му се оддаде посебна почит на Дејвид Боуви, благодарение на настапот на Ени Ленокс и Гери Олдман. Ени го нарече Дејвид „типичен визионер“ и „ултимативен иконоборец“, додека Гери ја прими награда доделена на Боуви за британска икона.
- Дејвид ти беше смртен, но твојот потенцијал беше натчовечки, а твојата музика ќе живее вечно, изјави тој.
Церемонијата ја отвори бендот Coldplay, кој понуди разнобоен, цветен и весел настап, преку песната „Hymn For The Weekend“. Тие ја добија наградата за најдобра британска група, при што станаа најуспешниот бенд во историјата на Британските музички награди. Крис Мартин има девет статуетки со неговото име, иако Роби Вилијамс води со 17 награди (12 како соло пејач, а 5 како пејач на групата Take That).
Останатите награди отидоа во рацете на Џејмс Беј за најдобар машки артист, додека Австралискиот рок бенд Tame Impala, ја земаа наградата за најдобра интернационална група. Канадскиот пејач Џастин Бибер, кој исто така настапуваше со песните „Love Yourself“ и „Sorry“ ја зема наградата за најдобра интернационална машка ѕвезда.
One Direction добија статуетка за најдобар спот за песната „Drag Me Down“.
Ријана се обедини со нејзиното поранешно момче Дрејк, за да ја исполнат нивната најнова песна „Work“. Кога таа се појави на сцена Дрејк и се поклонуваше, додека таа му врати со сензуално играње и тверкање.
Секоја чест за Дрејк кој успеа да издржи покрај тверкањето.