Бијело Дугме и сите се на нозе! Пеат, се смеат и весело играат во ритамот на едни од најпознатите песни на легендарната група, сега преаранжирани и соодветно адаптирани за оркестарска изведба, но подеднакво добри како и оригиналот.
Вчера вечер се вративме во старите добри времиња и речиси 3 часа уживавме во она што ни го прикажаа Ален, Брега и Тифа. „Ako ima Boga“, „Lipe Cvatu“, „А i ti me iznevjeri“, „Sanjao sam noćas da te nemam“ се само мал дел од песните кои ги слушнавме во текот на вечерта. Песни кои будат носталгија, а во исто време те креваат на нозе, па чувствуваш желба да пееш и во целост да го зграпчиш моментот.
Во преполната сала немаше каде игла да фрлиш, а уште помалку да седнеш. Но, ајде да не се лажеме, кој дошол на концерт на Дугме за да седи?!
Сакале да признаеме или не, има тука некоја тајна врска помеѓу публиката и хитовите на Бијело Дугме, па токму затоа секогаш остануваме „гладни“ за уште по некоја песна.
Еден бис, два биса...Би можеле така до зори, а тие воодушевени од приемот за крај нè почестија со безвременските „Hajdemo u planine“, „ Djurdjevdan, „Ima neka tajna veza“ и „Ruzica si bila“.
Дали ова беше добар концерт? Ма не...Ова беше и повеќе од одлично!