Во време на Цеци, Јелени и песни без автентичност, она што недостига несомнено е добра и квалитетна музика. Понекогаш инспирацијата за истата може да се најде во она што навидум сме го заборавиле...Нашата богата ризница на песни и ора.
Групата „Монистра“ веќе 15 години создава етно музика преку која ја негува традицијата и нè потсетува на старите добри изворни песни, кои своевремено се пееле низ различните делови од земјава.
Минатата недела групата го прослави својот јубилеј и го промовираше вториот студиски албум „Киниса моме на вода“, со голем концерт во МНТ. Недела подоцна се уште сме под импресии од нивниот енергичен настап, кој беше обогатен со гостувањето на Петар Ренџов, Владимир Крстов и женскиот хор „Св. Злата Мегленска“.
Тоа несомнено беше вечер за паметење, дури и за оние кои можеби нема да се пронајдат во етно фазонот или пак се премногу млади за да препознаат дел од песните кои што се изведуваат. Сепак, кога еднаш ќе ја слушнете уметноста која ја создава Монистра, веднаш ја забележувате страста со која и вдахнуваат живот на старата македонска песна и ја претвораат во нешто неповторливо. И тогаш не може, а да не почнете да потпевнувате и енергично да мрдате во своето седиште, зошто тоа е ритам што целосно ве обзема.
Ова се наши песни, песни низ кои е проткајана традицијата и кои никогаш не смеат да заминат во заборав, а Монистра на совршен начин нè потсетува на тоа.
Posted by IDIVIDI on Sunday, April 9, 2017