Во саботата (29 февруари) се емитуваше уште една епизода од вториот круг на најгледаното регионално музичко шоу „Ѕвездите на Гранд“, а во неа доминираше нашиот фантастичен пејач Гоце Бошкоски – Чоки.
Бошковски под менторство на Вики Миљковиќ во вториот круг ги отпеа песните „Stranac u noci“ од Масимо Савиќ и „Prsten i zlatni lanac“ од Хари Мата Хари, а со нив успеа да ги освои сите 6 гласа од строгото стручно жири и директно да се пласира во третиот круг.
Карлеуша речиси во сите епизоди од ова шоу држи лекции за шоубизнис и за тоа како еден уметник треба да изгледа на сцената, па веднаш прокоментира дека нашиот Гоце изгледа одлично, го пофали за намалувањето на килограмите, но и за комплетниот стајлинг:
- Си станал фраер, многу си ослабел и добро ти стојат очилата. Покрај добро пеење, мораш и добро да изгледаш, му кажа Карлеуша и му препорача да продолжи да работи на себе.
Целосниот настап од вториот круг ZvezdeGranda 🎤🎤🎤 1.Massimo Savic - Stranac u noci 2.Hari Mata Hari - Prsten i zlatni lanac
Posted by Goce Choki Boshkoski on Saturday, February 29, 2020
Како потсетување, Гоце Бошкоски – Чоки настапува ширум нашата земја уште од 2004 година, има снимено 10 студиски песни и досега има настапувано на реномираните фестивали Канео фест (2003), Макфест (2003), Еврофест (2007), Охридски трубадури – Охрид фест (2008, 2018 и 2019), но и на интернационалниот Еуро Поп фестивал во Зеница, Босна и Хецеговина (2008) каде што ја освојува наградата за најдобра интерпретација. Во 2011 добива зелена карта и заминува во Америка, но после 4 години одлучува да и се врати на Македонија и да продолжи да ја гради својата кариера. Лани исто така беше дел од „Ѕвездите на Гранд“, негов ментор беше Ѓорѓе Давид и заедно стигнаа до петтиот круг. Бошковски е женет, со сопругата Оливера имаат две дечиња Илија (4) и Илина (1).