Интернационалниот Тоше Проески фан-клуб форум, повторно ќе го одбележи 5-ти октомври, како ден на кој познатиот македонски пејач пред пет години го имаше својот последен и најуспешен концерт на Градскиот стадион во Скопје.
- Тоше тогаш посака, на овој датум, секоја година, да биде заедно со своите фанови, да ужива, да ја слави музиката и да го трасира патот на хуманоста. Можеби судбината го направи своето, но фановите не дозволуваат неговата желба да падне во заборав, информираат од Интернационалниот Тоше Проески фан-клуб форум.
Настанот „Биди и ти дел од ѕвезденото небо на Тоше“ ќе почне во 19:30 часот, со емитување на видео спотови на Тоше, а од 20 па се до 22:30 часот ќе бидат емитувани концертни настапи на Тоше, на плоштадот „Македонија“. За време на настанот ќе биде прикажан видео запис кој до сега не е емитуван за јавноста. Крајот ќе биде проследен со голем огномет.
Традиционално ќе се одржи и крводарителска акција организирана од Интернационалниот Тоше Проески фан-клуб форум и Црвениот Крст на Град Скопје, поддржана од Меѓународната фондација „Тоше Проески“. Под мотото „Јас штотуку спасив живот, а Вие?“ , во просториите на фондацијата „Никола Кљусев“ (веднаш до Дом на АРМ) од 10 до 18 часот ќе се одржи крводарителската акција.