Долго очекуваниот видео материјал за последната песна на Тоше Проески „Све је ово премало за крај “ денеска беше промовиран во спомен куќата на Тоше во Крушево. Автор на песната е Јелена Трифуновиќ, а аранжер е Никша Братош.
- Тоше планираше да ја сними песната „Се е премалку за крај“. Ми кажаа дека е пронајдена во неговиот компјутер. Не можеше да се искористат сите делови. Никша Братош, направи феноменален аранжман, песната заживеа и сега имаме уште еден убав спомен за тоше, рече Трифуновиќ на промоцијата.
- Кога човекот го слави својот роденден најблиските го даруваат со најубави желби и подароци. Шеста година по ред нашиот Тоше не е меѓу нас. Не е тука да му ги подариме најискрените желби. Болката и тагата не престануваат. Фондацијата се обидува да го прави она што тој најмногу го сакаше, им подарува и да ги прави среќни своите фанови. За нив подаруваме уште еден голем хит. Секоја негова песна е своја порака. На проектот се 16 песни кои го одбележуваат карактерот на Тоше и најновата „Се е ова премалку за крај, додаде Андреј Николоски од Фондацијата на Тоше Проески.
Музичката компанија OnAir.FM го објави новото видео на YouTube овозможувајќи им на обожавателите на Тоше да уживаат во ексклузивниот материјал во кој како што велат „ е вложен многу труд и љубов“.
Во видеото за „Све је ово премало за крај “ во улогата на Тоше се појавува манекенот Илија Илов, кој е еден од најбараните македонски манекени во Србија.
За својот ангажман во спотот Илов изјави дека воопшто не се обидувал да глуми, туку едноставно ја канализирал енергијата на Проески.