Во прекрасна опуштена и интимна атмосфера, денеска после пладне во новиот клуб XO во центарот на Скопје имавме можност да го преслушаме заедно со Каролина, нејзиниот најнов албум, Македонско Девојче 2.
Силните емоции, љубовта, топлината и убавиот звук е она што преовладува на албумот на кој се наоѓа веќе популарната „Чалгиска“, осум нови песни и две преработки на двете убави македонски народни песни „Те видов и се заљубив“ и „Ако згрешам нека изгорам“, која е посветена на починатата легендарна македонска фолк ѕвезда, Пепи Бафтировски. Вреди да се напомене дека вакви преслушувања на нови музички албуми е нормално насекаде во светот, особено во Англија и САД, каде големи ѕвезди ги собираат медиуми и соработниците со цел заедно да го преслушаат албумот. Конечно, нешто такво се случи и кај нас.
Ова е одлична идеја, за прв пат во Македонија групно да се преслуша некој нов музички производ.
- Ние сакаме да бидеме први во Македонија и да бидеме оние кои ги следат светските трендови. Во Македонија вакво нешто се случува прв пат. Досега нормално имало промоции, но не и преслушување на некој нов албум. Идејата беше на Бобан и заедно сакавме да направиме нешто кое никој пред нас не го направил. Сакавме заедно со сите наши соработници и медиумите да го преслушаме мојот нов албум. Македонско Девојче 2 беше работен две години.
Како беше сега да се работи со Никола Мицевски и Дејан Момироски, бидејќи претходниот албум, Македонско Девојче, соработуваше со Златко Ориѓански?
- Мене Никола не ми е нов соработник, бидејќи имаме соработувано и во минатото. Целата екипа која работеше на новиот албум се истите тие луѓе кои ме придружуваат на концертите, така да добро се знаеме меѓу себе. Ова е една другарска екипа и навистина ми беше лесно и мило да работам со неа, бидејќи имаше одлична атмосфера.
Дали Каролина има свој фаворит, своја омилена песна од 10-те кои се најдоа на новиот албум?
- Мене сите ми се допаѓаа, нормално! Но ако веќе морам да одберам би ја одбрала „Смеј ми се смеј“, која ми е омилена, откри Каролина за читателите на Идивиди.
Официјалната промоција на албумот ќе се одржи со пет концерти во Македонската опера и балет од 20-ти до 24-ти февруари.