Хрватскиот пејач, Тони Цетински, подготвува вистински музички спектакл за својот концерт во Скопје. На денешната прес конференција која што се одржа во ресторанот Венето, Skopje City Mall, Цетински и неговите соработници открија детали за она што ќе се случува на 28-ми ноември во арената „Борис Трајковски.
Македонската публика ќе има можност да ги слушне големите хитови на Тони Цетински, а воедно и да ужива во песните кои што ќе ги изведат неговите гости. Едно од изненадувањата на вечерта е настапот на хрватска ѕвезда која никогаш претходно не била во Македонија.
Запрашан дали шоуто во Скопје ќе биде слично на концертите од неговата турнеја, Цетински кратко одговори:
- Се трудиме секој концерт да има нешто свое, јас немам некаков стандарден тип на концерти, едноставно се прилагодувам.
Пејачот додаде дека шоуто кое што ќе го приреди на 28-ми ќе биде совршен спој на песни и гости, збогатен со одлична видео продукција. За сега е познато дека една од ѕвездите на вечерта ќе биде српскиот пејач Жељко Јоксимовиќ, додека другите гости ќе останат изненадување до самиот концерт.
Дуетот на Жељко и Тони предизвика големо внимание во јавноста поради српско –хрватската соработка. Цетински не крие дека хрватските медиуми го дочекале на нож поради ваквиот чекор, но е среќен бидејќи песната и се допадна на пошироката публика и сето тоа благодарение на YouTube.
-Публиката феноменално ја прифати песната и драго ми е што со тоа се разби предрасудата која ја наметнаа хрватските медиуми, изјави тој.
Зборувајќи за дуетите кои ги снимил во текот на својата кариера, Цетински истакна дека едни од омилените несомнено му се оние со Оливер Драгоевиќ и Тоше Проевски, пред сè поради тоа што соработката со нив го преминала професионалното ниво и прераснала во пријателство.
Спектакуларното шоу на хрватскиот пејач ќе започне во 21 часот, а цената на билетите е од 400 до 600 денари.