Гласовите кои што ги дадоа Македонија и Црна Гора за време на вчерашниот избор за песна на Евровизија нема да бидат земени во предвид поради нерегуларности во гласањето.
По завршувањето на натпреварот и победата на Шведска, организаторите на Евровизија соопштија дека за време на гласањето настанал проблем.
-Резултатите од гласањето на Македонија и Црна Гора не се земени во предвид по консултација со PricewaterhouseCoopers, независниот набљудувач на гласањето, и по одлуката на супервизорот и претседател на референтната група. И во случајот на двете земји, 100% од гласовите се добиени од телевоутинг. Дисквалификувањето на гласовите ќе биде дискутирано на следниот состанок на референтната група во јуни, објаснуваат од Евросонг.
Според правилата гласовите на земјите треба да бидат 50 % гласови од смс-пораки и 50 % од стручно жири, додека во случајот на Македонија и Црна Гора сите гласови се добиени од телевоутинг.
Победник на годишното издание на Евровизија е фаворитот Манс Семерлев од Шведска кој со својата „Heroes“ освои 365 поени, оставајќи ги зад себе Русија и Италија.