Евро-гол на Горан Пандев кој на Интер му донесе голема победа, голем чекор кон одбрана на титулата, но и премија од 500.000 евра за "нероазурите". Масимо Морати, првиот човек на клубот, на полувремето влегол во соблекувалната. Интер водеше со 1:0, но имаше и проблем со арбитрите и со "поцрвенетиот" Снајдер. Морати им ја ветил цифрата од 500.000 евра за победата над Милано. Како што е познато, натпреварот заврши со победа на Интер со 2:0 во фантастичен меч на кој блескаше нашата прва фудбалска виолина.
Асистенција, дирек и гол со кој ја запечати судбината на "црвено-црните" соседи. Според математиката, околу 30.000 евра премија ќе добие секој од играчите на Интер за големата победа. Кога сме кај Морати, тој како никогаш досега се радуваше при голот на Пандев во 65. минута кога стана јасно дека Милан е на колена и дека Интер заврши голема работа околу битката за скудетото.
Тимот од Милано го доби Пандев пред неколку недели кога струмичанецот како слободен играч замина на "Џузепе Меаца". Ја доби битката со Лацио и се пресели во шампионот на Италија за годишна плата од 3.000.000 евра. Неговата дневна заработувачка само од платата е околу 8.500 евра иако тука не се сметаат настапите и победите. Според бројките, нашиот фудбалер е еден од најевтините кои го носат дресот на Интер. Со настапите на последните 4 средби Пандев докажува дека вреди многу повеќе. Само колку за споредба, Ето има годишна плата од 10,5 милиони евра.
Трансферот на Пандев во Интер се покажува како полн погодок на клубот од "Џузепе Меаца", кој тоа што го вложи во Пандев го извади уште на стартот од неговата кариера во сино-црниот дрес. Кога на Интер му беше најтешко, кога Мурињо остана без Ето, кога имаше многу повреди Пандев имаше голем ефект и удел во играта, но и во резултатите на лидерот во Серија А. На сите средби беше одличен. Беше во улогата на асистент и стрелец. За 4 средби даде 2 гола... Од натпревар во натпревар е се подобар и подобар иако имаше долга пауза поради спорот со Лацио.
Интер утре му гостува на Јувентус во Купот на Италија. Тоа е новиот предизвик за Пандев иако нашиот најдобар фудбалер заслужи малку одмор и треба да биде поштеден од Мурињо со оглед на тоа дека в недела следува првенственото гостување кај Парма.