Управата на Челзи одлучи да ја продолжи соработката со Бранислав Ивановиќ и талентираниот Гаел Какута. Со овој потег сопственикот на клубот, Роман Абрамович, сака им стави до знаење на сите дека почнува со подмладување на екипата. За продолжувањето на договорот со Србинот се зборува веќе подолго време, но целата работа се одложуваше, што даде сомнеж дека би можел да ја напушти Англија. Иако за него беа заинтересирани Интер, Реал Мадрид и Јувентус, кои нудеа одлични суми, сепак, тренерот Карло Анчелоти во ниту еден момент не помисли да се раздели од него.
Според новиот тригодишен договор Ивановиќ ќе добие зголемување на неделната плата од 40.000 на 70.000 евра.
"Преговорите течат според планираното и ќе бидат успешно завршени", изјави агентот на играчот Владо Борозан.
Инаку, актуелниот договор на Ивановиќ истекува за 18 месеци.
Работата со 19-годишниот Гаел Какута е веќе завршена. Младиот француски напаѓач беше награден со четири и полгодишен договор со неделна плата од 40.000 евра.
"Откако пристигнав во Челзи сонував да стигнам до првиот тим. Сега кога имав неколку настапи посакувам да продолжам да напредувам. Го продолжив договорот бидејќи сметам дека овде е мојата иднина", изјави Какута.