Дејвид Бекам се наоѓа пред сензационално враќање во Премиер-лигата, меѓутоа не во Манчестер Јунајтед туку во Тотенхем. Менаџерот на Тотенхем, Хари Реднап, потврди дека клубот почнал преговори со ЛА Галакси околу ангажирањето на Бекс под наем, а што е најважно изјави дека трансферот е реален.
"Точно е дека ги почнавме првите разговори со Бекам за позајмица. Дејвид ни рече дека сака да дојде и да игра за Тотенхем. Затоа мораме да делуваме бргу. Оставив на надлежните да ги одработат преговорите со ЛА Галакси. Се надевам дека ќе бидат успешно завршени", објасни Реднап по победата над Фулам во саботата.
Како потсетување Бекам минатите две сезони за време на зимската пауза во американското првенство двапати играше како позајмен во Милан. Иако претходно изјави дека нема повторно да се сели, сепак, го смени своето мислење и посакува повторно да игра во Европа со оглед на тоа дека се уште не се откажал од амбициите да игра за репрезентацијата.
Тотенхем му гостува на Евертон в среда, меѓутоа доколку се реализира трансферот до 16 јануари тогаш Бекс ќе има деби од соништата, против матичниот клуб Манчестер Јунајтед.