Nissan се припрема за радикално враќање на пазарот на супермини возила со новата верзија на Micra, чиј закамуфлиран прототип е забележан пред неговото официјално претставување на овогодинешното Paris Motor Show во октомври.
Сегашната верзија е базирана на платформа која е 13 години стара и изгледа застарено во споредба со скоро секој автомобил од неговата класа.
Најновиот модел ќе ја користи сосема новата CMF-B платформа наменета за малечки автомобили, која ја користат и Renault, додека дизајнот на екстериерот ќе биде исклучително сличен на концептот Sway кој беше прикажан минатата година на саемот во Женева, со аглестите елементи на предницата и страните и со задница инспирирана од онаа на Nissan Juke.
Новата Micra ќе биде подолга, поширока и пониско поставена од сегашниот модел, што значи просторот во внатрешноста ќе биде значително поголем и за патниците и во багажникот. За ентериерот се очекува да биде искористен голем дел од футуристичкиот дизајн на кабината од Sway.
Деталите околу моторите кои ќе бидат понудени сè уште не се знаат, меѓутоа се очекува на располагање по самото лансирање на моделот да бидат турбо варијанти на бензински и дизел мотори.