Honda официјално ќе ја претстави новата верзија на Civic Type R моделот на Paris Motor Show во октомври, но прототипот веќе се тестира на патиштата и некои информации во врска со моделот веќе се знаат.
Од промотивните и шпијунски слики се гледа дека возилото има поагресивен изглед од сегашниот модел, а забележливо е и тоа што на промотивната слика ауспухот има 2 цевки, додека на прототипот има 3 – но тоа најверојатно значи дека Honda тестира разен распоред на издувните цевки. Новиот Civic Type R ќе биде за околу 3cm поширок, 2cm понизок и 13cm подолг од сегашниот.
Иако сегашниот модел излезе минатата година, новиот ќе биде претставен на саемот во Франција во октомври (заедно со 10-тата генерација на хечбек моделот), а на пазарот ќе треба да се појави во септември наредната година.
Од Auto Express дознаваат дека концепт моделот кој ќе биде претставен во Франција ќе го има вградено сегашниот 2.0 литарски 4-цилиндарски турбо мотор, кој ќе продолжи да се вградува и во производствениот модел. Сегашните перформанси од 310 коњски сили и 400Nm вртежен момент се очекува да бидат подобрени – 345 коњски сили и 450Nm вртежен момент, додека забрзувањето од 0-100км/ч ќе биде под 5 секунди.
Се претпоставува и дека Honda кај овој модел ќе го задржи погонот само на предните тркала и мануелниот 6-брзински менувач.
Подобрувањата во внатрешноста ќе се фокусираат на квалитет, со визуелно подобрен и подобро интегриран infotainment дисплеј.