BMW планираат наплив од SUV модели пред да заврши оваа декада, а еден дел од таа сложувалка ќе биде и новото X4 купе, забележано на шпионски фотографии за прв пат пред неговото деби во 2018-та.
На сликите се забележува модернизиран дизајн на овој купе SUV модел со средна големина – на предниот дел е новата решетка во тандем со нови фарови, додека на задниот дел забележливи се новите фарови со BMW беџот во средина, и регистарската табличка позиционирана пониско на задниот браник во однос на сегашниот модел.
X4 е сè уште релативно “свеж“ модел, кој за прв пат на пазарот се има појавено во 2014-та, па така замената која BMW ја нуди по само 3 години делува чудно. Меѓутоа, вреди да се спомене дека платформата од X3 врз која е направено X4 е стара 7 години.
BMW паралелно со овој модел ја припрема и следната генерација на X3 со нова, полесна платформа, која би требало да биде претставена пред крајот на оваа година , па поради овој факт „освежената“ X4-ка со нова шасија и мотори за 2018-та има многу повеќе смисла.
Новата платформа која ќе ја користи идната генерација на X3 се вели дека ќе овозможува погон на задните тркала и ќе биде за 100кг полесна од онаа кај сегашниот модел, а ќе биде и подолга за да се зголеми просторот за патници. Истата платформа се очекува да се користи и за X4.
Покрај вообичаената понуда на мотори, новата платформа ќе овозможи и вградување на plug-in хибридна технологија. Најверојатен кандидат за неа би бил 2.0 литарскиот 4-цилиндричен бензински мотор во комбинација со електричен, превземени од сегашниот 330e saloon модел, со моќност од 252 коњски сили и домет само со електричниот мотор од околу 50км.