Skoda ги поднови моделите Superb и Superb Estate (караван верзијата) за 2017, претставувајќи разни надополнувања на технологијата вградена во нив, систем за асистирање на возачот, како и неколку дополнителни стилски опции на овој „буџетарски“ ривал на Mercedes E-Class моделите.
Најголема новост е Care Connect опцијата за итна асистенција која сега е стандардна кај сите Superb модели со Ambition тримот, а купувачите ќе ја добијат без разлика на одбраниот infotainment систем.
Care Connect автоматски започнува итен повик доколку системот се активира при некоја незгода, но тој може да се користи и мануелно преку притискање на копче на кровот.
Покрај Care Connect, на располагање е и Connect апликацијата на Skoda преку која сопственикот може да управува со одредени опции на автомобилот преку смартфон – на пример, да провери дали прозорците се затворени, вратите заклучени и сл., како и да го лоцира автомобилот на мапа (на пр. во случај на кражба или заборавање каде е паркиран).
Infotainment системот е подобрен со поголеми дисплеи (до 9.2 инчи), а подобрен е и системот за контрола на растојанието при паркирање кој сега може да детектира објекти и пред возилото. Тој исто така може да го предупреди возачот и автоматски да закочи доколку детектира дека маневарот при паркирање може да заврши со удар.
Новиот Superb ќе доаѓа со вентилирано возачко седиште и Digital Voice Enhancement систем кој го засилува гласот на возачот и сопатникот за подобро да се слуша кај патниците на задните седишта. Од Skoda ветуваат и потивка кабина, благодарејќи на новиот акустичен филм поставен помеѓу двојно застаклените предни странични прозорци.
Понудена ќе биде и опција за 19-инчни бандажи како нов финиш со црвена металик боја, додека најскапите варијанти со L&K трим ќе имаат нови хромирани ленти на вратите, како и црн внатрешен кров.