Новата Kia Stonic е откриена во серија дизајнерски скици, пред нејзиното деби при крајот на годинава. Не само што ова е прво официјално претставување на новиот SUV кросовер модел базиран на моделот Rio, туку е и првпат Kia да го потврди името Stonic.
Инспириран од поголемите SUV модели Sportage и Sorento, новиот Stonic има слична предна решетка и фарови, но со нов LED светлосен потпис. Испакнатиот преден спојлер му дава на овој модел поспортски и урбан дизајн, а SUV обележја му се подигнатиот заден дел и црните шипки на кровот.
Дизајнот на скиците е пренагласен во однос на тоа како ќе изгледа продукцискиот модел, што е забележливо доколку тие се споредат со шпионските фотографии од пред неколку месеци.
Сè уште не е прикажан изгледот на ентериерот, но се претпоставува дека во него технологијата ќе игра голема улога, со голем централен екран и беспрекорна смартфон конективност.
За разлика од веќе етаблираниот Sportage, новиот помал SUV нема да биде понуден со погон на сите тркала. Покрај познатите бензински и дизел мотори кои ќе бидат на располагање по неговото лансирање, се очекува подоцна Kia да понуди и plug-in хибридна опција чија технологија најверојатно ќе биде превземена од моделот Niro.