Aston Martin го подготвуваат производството на нивниот прв комплетно електричен автомобил наречен RapidE. Тој ќе биде базиран на истоимениот концепт од 2015-та, а на патиштата ќе се појави во 2019 во ограничена количина од само 155 возила.
Скици објавени од компанијата покажуваат како RapidE ќе изгледа – а тоа е скоро идентично на стандардната Rapide S верзија, но со дизајнерски елементи во сино кои ќе ја означуваат електричната верзија.
Aston Martin RapidE ќе биде купе со 4 врати како и Rapide S, со тоа што 6.0 литарскиот V12 мотор ќе биде заменет со комплетно електричен погон. Сега засега од компанијата нема детални информации во врска со него, освен изјавата на извршниот директор Енди Палмер во 2015-та кој изјавил дека може да се очекува моќност од дури 1014 коњски сили и погон на сите тркала. Се очекува и домет од над 320km со едно полнење на батеријата.
Според Палмер, нема да има ни преголема разлика во тежината помеѓу RapidE и V12 моделот, а цената се очекува да биде околу 230 000 евра, иако намалувањето на цените на батериите во меѓувреме би можело малку да ја намали севкупната цена.