Подновена верзија на Honda Jazz е претставена пред Frankfurt Motor Show, кај која е подобрен стајлинот на екстериерот, внатрешниот трим, а има и нов бензински мотор.
Стилските промени се минимални и едвај забележливи – предната решетка со нов изглед е „спарена“ со предни фарови со нов светлосен потпис, а предницата има поагресивни контури. На задниот дел, намалени се ребрата во задниот браник, и додадена е нова лента во сјајна црна боја која ги поврзува. Колор палетата, пак, на новата Honda Jazz е проширена со нова металик сина нијанса.
Подновениот Jazz ќе биде на располагање и во нов спортски трим наречен Dynamic, каде што предниот и заден браник ќе имаат контрастни црвени акценти, предни светла за магла, спојлер на задниот дел, како и 16-инчни алуминиумски бандажи во сјајна црна боја. LED фаровите ќе бидат стандардна опција.
Додека „обичните“ Jazz модели ќе имаат кабина идентична на сегашниот модел, оние со Dynamic тримот ќе имаат портокалови детали на седиштата како и низ кабината, и кожен волан и дршка на менувачот.
Dynamic верзијата ќе виде понудена со нов 1.5 литарски 4-цилиндричен бензински мотор од 130 коњски сили за кои сè уште не се објавени перформансите, но се знае дека ќе биде „спарен“ со 6-брзински мануелен менувач како стандард, и автоматски како опција.
Од Honda велат дека новиот мотор ќе има потрошувачка од 22km/l и CO2 емисии од 124g/km со автоматскиот менувач. Обичниот модел ќе доаѓа со 1.3 литарскиот мотор од 102 коњски сили и 5-брзински менувач.
Новиот Honda Jazz модел „во живо“ ќе дебитира во Франкфурт, а продажбата ќе започне во ноември, со првите испораки во почетокот на 2018-та.
