Lotus го претставија нивниот нов модел по подолго време – Evija, комплетно електричен хипер-автомобил, најмоќниот автомобил на светот кој може да вози и на обични патишта, а не само на тркачки патеки.
Evija претходно бил познат како Type 130, е првиот електричен модел на Lotus, чиј дизајн е инспириран од Le Mans спортските автомобили и F1 тркачките модели.
Автомобилот е базиран на шасија од јаглеродни влакна, со интегриран преден сплитер инспириран од Type 73 Формула 1 автомобилот дизајниран да ја лади и предната оска и батеријата, која е лоцирана зад седиштата. За подобрување на аеродинамиката и перформансите, пак, во задниот дел е интегриран активен спојлер.
Моќноста на Lotus Evija е „монструозна“ – 2000 коњски сили, 1700Nm вртежен момент (4,5 пати повеќе од моментално најмоќниот Lotus Evora 430), забрзување од 0-100км/ч. за помалку од 3 секунди, и максимална брзина над 320км/ч.
Батеријата е со капацитет од 70kWh и овозможува домет од над 400 километри, а може целосно да се наполни за 18 минути со полнач од 800kW, кој сè уште не постои.
Батеријата напојува 4 електрични мотори (по еден на секое тркало), што значи дека погонот е на сите тркала. Бандажите се магнезиумски со големина од 20 инчи напред и 21 позади, сопирачките се јагледорно-керамички, додека гумите се Pirelli Trofeo R.
Вратите немаат рачки туку се отвораат од далечина преку клучот, а тримот во кабината е скоро целосно од јаглеродни влакна.
Поголемиот дел од важните функции на автомобилот се контролираат преку воланот, а останатите преку централната конзола. Ќе бидат произведени само 130 Lotus Evija модели, од кој секој ќе чини 1.8 милиони евра.