На овогодинешното Tokyo Motor Show, Nissan го претставија концептот Ariya – комплетно електричен автономен кросовер за кој се очекува да еволуира во продукциски модел до 2021.
Nissan Ariya е изграден врз нова модуларна архитектура која најверојатно ќе се наоѓа на сите идни електрични модели на јапонскиот бренд. Платформата има пар електрични мотори, ниско монтиран батериски пакет, систем за обновување на енергија и погон на сите тркала, а спецификациите во поглед на перформансите сè уште не се потврдени.
Благодарение на отсуството на класичен мотор и поставеноста на батерискиот пакет, Ariya има комплетно рамен под, а мноштвото стаклени површини нудат „панорамски“ поглед на опкружувањето на автомобилот.
Oвој концепт има 21-инчни алуминиумски бандажи и слични дизајнерски елементи како Nissan IMk, а финиширан е со уникатна двотонска сина боја во која има малечки стаклени честички кои создаваат два различни ефекти во зависност од аголот на гледањето. Така, од далеку автомобилот изгледа како да има матиран финиш, но од блиску бојата делува како да е металик.
Во ентериерот има контроли за температура чувствителни на допир кои се повлекуваат во командната табла кога не се користат, 12.3 инчен infotainment систем, дигитална инструмент табла, како и последната верзија на ProPilot 2.0 полу-автономниот систем за асистенција на возачот кој може да му асистира при претекнување, како и автоматски да излегува од автопатите по негово барање.