Ослободете се лесно од мразот и сланата на шофершајбната

Секое утро се соочуваме со магла и слана, а наскоро кога температурите ќе паднат под нулата, мразот ќе биде постојан придружник на шофершајбната. Она што прво ни паѓа на памет е да истуриме топла вода или пак да почнеме да стругаме со остар предмет.

Сепак – ова е најлошото што можете да и го направите на шофершајбната, бидејќи поради ниските температури на кои била изложена, лесно може да пукне, а стаклото да се оштети. Исто така, не е паметно да се одлучите и за скапо средство кое се налева во резервоарот за течност на шофершајбната, бидејќи при прскањето автоматски се вклучуваат и бришачите кои може или да го оштетат стаклото или самите да се оштетат со оглед на тоа дека се уште има мраз.

Едно од подобрите решенија е да ја пуштите климата во автомобилот на опција за одмрзнување, да бидете стрпливи, да почекате воздухот да се загрее и мразот самиот да попушти.

Одлично решение, а во исто време брз, ефикасен и исплатлив начин е спречувањето на формирање леден слој. Тоа може да го направите на тој начин што секоја ноќ ќе ја напрскате шофершајбната со средство кое самите ќе го направите од ¼ оцет и ¾ вода. Вишокот од растворот избришете го со крпа и наутро ќе ве дочека чиста шофершајбна, без слоеви од мраз и слана.