Стокхолм, 4 ноември (МИА) - Хрватскиот премиер Јадранка Косор и нејзиниот словенечки колега Борут Пахор денеска во Стокхолм потпишаа договор за препуштање на решавањето на пограничниот спор на меѓународниот арбитражен суд.
Со договорот е предвидено воспоставување меѓународен арбитражен суд кој ќе ја утврди границата меѓу двете земји на море и копно, излегувањето на Словенија на отворено море и користење на релевантните морски подрачја.
Арбитражниот суд, кој ќе има пет членови, при одредувањето на границата ќе го применува меѓународното право.
Сите процесни рокови почнуваат кога Хрватска ќе го потпише договорот за приклучување кон ЕУ, што значи дека судот ќе ја донесе пресудата кога земјата ќе стане полноправна членка на Унијата.