Загреб, 25 ноември (МИА) - Како последица на инфицираност со вирусот H1N1 на новиот грип од типот А, во Хрватска досега починаа 11 лица, соопшти денеска хрватското Министерство за здравство.
Во соопштението се посочува дека само минатата недела се регистрирани 13.960 нови заболени од грипот А, со што вкупниот број на болни од појавата на вирусот во земјата се зголемил на 25.576.
Од вкупниот број заболени речиси 25.000 го прележале грипот без компликации, се наведува во соопштението.
За во петок е најавен стартот на вакцинацијата против вирусот на грипот А во Хрватска, при што прво ќе бидат вакцинирани ризичните групи на лица, а потоа и сите останати граѓани кои го сакаат тоа.
Вакцината против вирусот H1N1 во Хрватска ќе биде бесплатна.