Бања Лука, 6 април (МИА) - Високиот претставник на меѓународната заедница во Босна и Херцеговина и специјален претставник на Европската унија, Валентин Инцко нагласи денеска во Сараево во разговорот со министерот за надворешни работи на Шпанија Мигел Анхел Моратинос и американскиот заменик-државен секретар Џејмс Стајнберг, дека ситуацијата во БиХ е вознемирувачка и дека изборите во октомври претставуваат можност за промена на овој тренд.
Моратинос и Стајнберг изразија надеж дека предизборната кампања ќе биде насочена кон создавање подобри услови за живот на сите граѓани, како и на конкретни мерки, со кои би се обезбедило што е можно поскоро земјата да тргне по патот кон членство во ЕУ и НАТО, соопшти канцеларијата на Инцко.
- Овие конкретни мерки се однесуваат на економијата и воопшто на реформите, кои ќе ја претворат БиХ во веродостоен кандидат за членство во ЕУ, изјави Инцко, додавајќи дека политичките лидери треба да се воздржуваат од вештачко создавање на тензии.
Во врска со повиците за мирно раздружување на БиХ, Моратинос и Стајнберг се согласија со Инцко дека Дејтонскиот договор не нуди таква можност.
- Овие тврдења се неприфатливи и со нив мора да се престане, рече Инцко, нагласувајќи дека БиХ може да стане членка на ЕУ и НАТО единствено како држава и оти не постои друга опција.