Приштина, 9 мај 2010 (МИА) - Ни една инкриминирана група не може да го расипе имиџот на Албанците и соработката меѓу Косово и Македонија, изјави косовскиот премиер Хашим Тачи, во реакцијата во врска со зачестените закани за дестабилизација на регионот.
- Сакам да потенцирам дека регионот никогаш не бил помирен. Косово е многу стабилно, неговата стабилност се рефлектира во мирот и регионалната соработка и во сигурната европска перспектива, изјави Тачи, пренесува дописникот на МИА.
Според него ни една инкриминирана група, која и да е, не може да го расипе имиџот на Косово или добрите односи и соработка меѓу Република Косово и Република Македонија.
- Сум рекол и порано, нашата соработка со Македонија е одлична, и со Албанија и со Црна Гира исто така. Тоа е нашиот единствен пат за перспективата за сигурен развој на регионот, соработката меѓу соседите и европската перспектива, изјави Тачи.