Сараево, 2 јуни 2010 (МИА) - Во Сараево денеска почнува средбата ЕУ-Западен Балкан, на која ќе учествуваат министрите за надворешни работи на земјите од регионот, високо позиционирани претставници на ЕУ и земјите-членки на Унијата, како и на САД, Русија и Турција, соопштија агенциите.
На конференцијата, свикана на иницијатива на Шпанија, во својство на претседател на Европската унија, се очекуваат 48 делегации, 29 министри и генерални секретари на институции и организации во ЕУ.
Министерот за надворешни работи на Србија Вук Јеремиќ изјави дека очекува средбата да испрати јасен сигнал дека европската интеграција на Западен Балкан нема да биде запрена.
Денешниот настан се очекува да го компензира неуспехот на претходната средба на високо ниво ЕУ-Западен Балкан, која беше бојкотирана од српскиот претседател Борис Тадиќ.
За да ја убеди Србија да учествува на собирот, ЕУ предложи средбата да биде организирана во согласност со таканаречениот „протокол Гимни“, односно учесниците да бидат претставувани само според името и презимето, без официјално да се споменуваат нивните земји.
Официјалната политика на Белград е да не присуствува на настани на кои Косово е претставено на државно ниво, бидејќи Србија не ја признава еднострано прогласената независност на Косово.
ЕУ во Сараево ќе биде претставена на највисоко ниво од високиот претставник на ЕУ за надворешна политика Кетрин Ештон и еврокомесарот за проширување Штефан Филе.