Париз, 2 јуни 2010 (МИА) - Земјите од Западен Балкан стравуваат за нивната европска иднина, пишува денешното издание на париски „Ле Монд“ во статијата посветена на самитот од Сараево. Весникот смета дека самитот, кој се случува десет години по тој во Загреб има за цел да го потврди принципот дека сите земји од регионот ќе бидат интегрирани во ЕУ, но без притоа да биде утврден рок за нивната интеграција.
„По грчката криза, на континентот ’дува лош ветер’. Додека владите се повеќе најавуваат мерки на буџетско штедење, никој повеќе не дава оптимистички изјави за новиот процес на проширување на ЕУ“, вака „Ле Монд“ го опишува контекстот во кој се одржува самитот ЕУ-Западен Балкан.
Оваа иницијатива на шпанското претседателство со ЕУ, според весникот била пречекана со скептицизам од некои земји членки на ЕУ. „Ле Монд“ посебно се задржува на повеќенеделните тешки подготовки со цел на иста маса да седнат претставниците на Србија и Косово. Не случајно во Сараево е постигнат компромис – самитот да наликува повеќе на една обична неформална средба на министрите за надворешни работи, без заедничка официјална фотографија, без национални знамиња, без имиња на земјите учеснички, без заедничка декларација.
На дневниот ред во Сараево, според „Ле Монд“, како што јавува дописникот на МИА од Париз, можно е да се најде и „конфликтот меѓу Атина и Скопје во врска со името на Македонија.“ Од 1991 година, Грција го блокира меѓународното признавање на својот сосед, сметајќи дека името Македонија припаѓа на нејзиното културно и историско наследство. Македонија, како што потсетува „Ле Монд“, е блокирана од овој конфликт во нејзиниот процес на европска интеграција.