Хаг, 21 јули 2010 (МИА) - Жалбениот совет на Хашкиот трибунал денеска ќе му изрече правосилна пресуда на поранешниот командант на Ослободителната војска на Косово (ОВК) Рамуш Харадинај, кој во првостепената постапка во април 2008 година беше ослободен од обвинението за воени злосторства и злосторства против човештвото.
Претресниот совет, покрај Харадинај, во првостепената постапка го ослободи и поранешниот припадник на ОВК Идриз Баљај, додека Љах Брахимај беше осуден на шест години затвор, поради свирепо постапување и мачење на затвореници во штаб на ОВК во Јабланица.
Обвинителството на Хашкиот трибунал после тоа поднесе жалба на пресудата, во која истакна дека „судењето го одбележала атмосфера на вознемирување и заплашување на сведоци“, како и дека судиите во пресудата навеле оти „многу сведоци го наведувале стравот како причина зошто не сакаат да се појават пред судот и да сведочат“.