Букурешт, 13 август 2010 (МИА) - Националната агенција за метеорологија на Романија го продолжи предупредувањето „жолт код“, втор степен на тревога на четиристепената скала, поради високите температури до понеделник.
Агенцијата предупредувањето го објави пред два дена со важност до сабота.
Се очекува температурите да надминат 35 степени Целзиусови, посебено во источниот и јужниот дел на државата.
Денеска попладне метеоролозите предвидуваат највисоките температури да бидат измерени во јужниот и источниот дел на областа Мунтенија, во Букурешт, во континенталниот дел на Добруџа и во јужниот дел на областа Молдавија. Се очекува температурите да достигнат 38-39 степени Целзиусови.
Во планинските области и во западниот дел на државата се очекуваат поројони дождови, ветер, бури и град, предупредуваат од Агенцијата.
Вчера од топлините во Романија починаа пет лица, а повеќе од 80 луѓе колабираа.