Белград, 17 октомври 2010 (МИА) - Поранешниот директор на српската Агенција за безбедност и информации-БИА, Раде Булатовиќ, на обвинителството за воени злосторства му предлагаше преговори за предавање на Ратко Младиќ, соопшти српскиот обвинител за воени злосторства Владимир Вукчевиќ за белградскиот весник „Блиц“.
Раде Булатовиќ ги предлагал преговорите пред јули 2006 година, односно пред формирањето на Екипата за соработка со Хашкиот трибунал.
Обвинителството позитивно одговорило и Вукчевиќ бил подготвен да преговара, но како пишува „Блиц“, следниот ден Булатовиќ отишол кај тогашниот премиер Воислав Коштуница и преговорите пропаднале.
-Тоа беше чиста опструкција, изјави обвинителот.
Пред неколку дена во интервју за списанието „Време“ Вукчевиќ рече дека во 2006 година имало најголема шанса за апсење на Младиќ, но оваа можност била пропуштена заради опструкција, за која уште не е утврдено кој е одговорен.
-Го држевме Младиќ во рака и беше чисто техничко прашање како да се изврши апсењето, рече Вукчевиќ за „Време“.