Сараево, 19 октомври 2010 (МИА) - Главниот обвинител на Меѓународниот трибунал за воени злосторства во поранешна Југославија, Серж Брамерц повика вчера во Сараево сите држави од поранешна Југославија и меѓународната заедница да вложат поголеми напори за апсење на Ратко Младиќ и Горан Хаџиќ.
Брамерц, кој од вчера е во тридневна посета на Сараево изјави дека апсењето на Младиќ и Хаџиќ е „императив“ заради жртвите, но и затоа што одлагање „го отежнува помирувањето во регионот“ и го нарушува меѓународното право.
- Ги повикувам одново државите од регионот и меѓународната заедница да преземат мерки за побрзо апсење. Времето истекува, изјави тој.
Според него, апсењето на Младиќ и Хаџиќ е клучна цел пред затворањето на Хашкиот трибунал. По Сараево, Брамерц ќе замине за Загреб, а во почетокот на ноември е планирано да го посети Белград.