Лондон, 16 декември 2010 (МИА) - Решението Џулијан Асанж да остане и понатаму во затвор, и покрај одлуката за ослободување со кауција на општинскиот суд Вестминстер, е донесено од британското обвинителство, а не од шведските правосудни власти, како што тоа го објаснија лондонските адвокати на основачот на „Викиликс“.
Пред Вишиот суд во Лондон, според тоа, денеска ќе се појави британското обвинителство со жалба на одлуката на општинскиот суд за пуштање на Асанж од притворот со кауција од вкупно 240 илјади фунти, со барање таа да се промени, јави дописникот на МИА од Лондон.
Претставник на обвинителството во Стокхолм објасни за лондонските медиуми дека тие немале добар увид во решението за ослободување со кауција за да можат веднаш да реагираат.
По продолжувањето на притворот за Асанж неговите адвокати соопштија дека е одложено ослободувањето затоа што шведските власти поднеле жалба, за која ќе мора да се одлучи во рок од 48 часови. Шведското обвинителство го отфрли таквото тврдење, објаснувајќи дека тие немаат никаква јурисдикција на британската територија, па дека сите решенија што се носат во овој случај се донесени од обвинителството во Лондон, кое само ги застапува шведските власти во случајот против основачот на „Викиликс“.
Во изјавата претставникот на шведското обвинителство уште вели дека од кај нив нема да бидат испратени никакви дополнителни докази за претресот по жалбата пред Вишиот суд, туку дека целата таа работа им се препушта на Британците.
Лондонските медиуми тврдат дека британското обвинителство на денешната расправа пред Вишиот суд ќе бара Асанж сепак да остане во затвор до завршувањето на процесот околу неговата екстрадиција во Шведска, а тој по правило трае по неколку месеци. Каква и да биде одлуката на Вишиот суд, таа нема да значи прекинување на процесот покренат од шведското обвинителство според кое Асанж треба да одговара по обвинувањата на две Швеѓанки за сексуално насилство и силување, за што тој беше уапсен и се бара да биде префрлен во Шведска.