Загреб, 1 јули 2011 (МИА) - Полскиот премиер Доналд Туск изјави дека очекува Хрватска есеноска да го потпише договорот за членство во Европската унија и најави дека лично ќе го однесе договорот во Загреб пред свеченоста на потпишувањето.
- Есента е одлично годишно време во Хрватска, истакна Туск, додавајќи оти се надева дека дотогаш се ќе биде завршено.
Но, тој не прецизира каде ќе биде потпишан договорот.
Полска од Унгарија денеска го презеде шестмесечното претседавање со Европската унија, а меѓу приоритетите, според најавите од Варшава, ќе биде продолжување на проширувањето на Унијата кон земјите од Западен Балкан.
Полска како најважни задачи на својот прв мандат на чело на Унијата, официјално ги постави „европските интеграции како извор за развојот и создавање на безбедна и отворена Европа“ со силна поддршка за проширување кон Западен Балкан.
Еден од приоритетите се и развојот на европската одбранбена политика и поцврсти врски со соседите на ЕУ.