Приштина, 17 август 2011 (МИА) - Заменикот помошник американски државен секретар за Европа и Евроазија, Филип Рикер изјави денеска во Приштина дека Косово е независна и суверена држава и има право да бара почитување на законите на целата територија.
- Косово е независна и суверена држава која има право да ја прошири својата власт на целата територија на државата. Овде се работи за владеење на законите, а тоа е фундаментален концепт не само овде туку и во цела Европа, изјави Рикер по состанокот со косовскиот премиер Хашим Тачи.
Тој нагласи дека и посредникот на ЕУ во дијалогот меѓу Белград и Приштина, Роберт Купер јасно ставил до знаење дека не може да има враќање на статус кво.
- Сега треба враќање на дијалогот и поздравуваме враќање на преговарачка маса под покровителство на ЕУ во почетокот на септември, рече Рикер.
Како што нагласи, Тачи и министрите во косовската Влада му навеле дека се определени за владеење на законот.
- Тоа е важно за целиот регион, изјави тој додавајќи дека воведување владеење на законите на целата територија на Косово има за цел да се обезбеди „поквалитетен и побезбеден живот за сите луѓе на Косово, вклучувајќи го и северот“.