Белград, 28 септември 2011 (МИА) - Српската полиција и обвинителството со денови ги проверуваат социјалните мрежи Фејсбук и Твитер и разни други веб страници, на кои трагаат по сите оние што преку интернет им се закануваат на учесниците на геј парадата и повикуваат на организирана пресметка со нив в недела на 2 октомври во Белград.
Весникот „Прес“ пишува дека ширум Србија голем број припадници на радикални организации и навивачки групи се повикуваат на информативни разговори во полициските станици. Проверките на интернет ќе бидат поинтензивни овие денови, а во случај на сериозни закани ќе бидат поднесени и кривични пријави.
- Ги преземаме сите мерки со цел да спречиме евентуални немири низ улиците на Белград. Деноноќно ги проверуваме интернет страниците и социјалните мрежи на кои најмногу се упатуваат закани, се вели во соопштението на српското Министерство за внатрешни работи.
Од друга страна, Полицискиот синдикат на Србија ги повика организаторите на „Парадата на гордоста“ да го откажат настанот, додека нејзините неподдржувачи да покажат висок степен на одговорност и да не предизвикаат немири доколку таа се одржи.