Лондон, 1 октомври 2011 (МИА) - Меѓународната организација Амнести интернешнл (АИ) оцени денеска дека одлуката на српските власти да го забранат одржувањето на „Парадата на гордоста“ во Белград е мрачен ден за човековите права во Србија.
- Српските власти како и во 2009 година, попуштија под притисокот на десничарските групи, кои не го разбираат, ниту го почитуваат правото на слободата на изразувањето, кое е загарантирано со српскиот Устав и со законите, изјави денеска истражувачот на АИ за Балканот, Сиан Џонс.
АИ оценува дека забраната на „Парадата на гордоста“ преставува „голем чекор наназад за човековите права во Србија и голема отстапка на Владата во однос на десничарските националистички групи“.
Организацијата изрази поддршка на „Парадата на гордоста“ и соопшти дека со забранувањето на овој настан српската Влада не ја исполнила својата обврска за гаранција на слободата на изразување и собирањето.