Анкара, 1 април 2012 (МИА) - Турскиот министер за надворешни работи Ахмет Давутоглу, коментирајќи ги случувањата во Сирија, изјави дека на Турција не и останал никаков избор „освен директна интервенција“.
- Не можеме да стоиме со скрстени раце и мирно да набљудуваме што се случува во Сирија. Нашето вмешување се претвора во неизбежност. Тоа не е избор туку должност, изјави Давутоглу.
Тој додаде дека режимот на претседателот Башар Асад направил „голем број грешки“ кои ги признаваат дури и Русија, Иран и Кина.
Во Истанбул денеска беше отворена втората средба на групата држави Пријатели на Сирија на која ќе се разгледаат можностите за притисок врз сирискиот режим. На средбата учествуваат над 70 држави.
Во Инстанбул на средбата присуствува и американскиот државен секретар Хилари Клинтон, голем број министри за надворешни работи од Европа и раководството на Сирискиот национален совет кој се смета за опозиција на режимот.