Белград, 21 мај 2012 (МИА) - Лидерот на Српската напредна партија Томислав Николиќ прогласи победа на претседателските избори во Србија, соопштија светските агенции.
Во синоќешното директно телевизиско вклучување од неговиот изборен штаб тој изјави дека го достигнал врвот на својата политичка кариера.
-Србија нема да се тргне од патот кон ЕУ и заштитата на Косово. Ние ќе ги решаваме внатрешните проблеми, кои ги создаде Демократската партија и (досегашниот претседател) Борис Тадиќ. Ќе ја развиваме економијата, ќе се бориме со сиромаштијата и корупцијата, ќе создаваме работни места, истакна националистичкиот опозициски лидер, цитиран од агенциите.
Според неофицијалните податоци на Центарот за слободни избори и демократија (ЦеСИД) Николиќ води пред својот соперник Тадиќ со 49,2 проценти наспроти 47,6 проценти.
Досегашниот претседател на Србија Борис Тадиќ го призна поразот на претседателските избори и на победникот му посака успех, соопштија агенциите.
-Одлуката на граѓаните ја сметам за законска, говорејќи за проблемите што требаше да ги решавам како претседател, а од кои многу не успеав да ги решам, изјави Тадиќ на прес конференција во својот изборен штаб.
Тој изборите ги оцени како чесни и транспарентни и го поздрави својот соперник за победата, посакувајќи му успех.
-Ги повикувам сите политички фактори за ја зачуваат стратегиската ориентација на Србија кон ЕУ, додаде проевропски ориентираниот досегашен претседател.