Сараево, 21 март 2012 (МИА) - Известувачот на Европскиот парламент за Србија Јелко Кацин оцени дека со победата на лидерот на Српската напредна партија Томислав Николиќ во вториот круг од претседателските избори во Србија не се случило ништо страшно и оти оваа партија од 2008 година е дел од проевропска Србија.
Кацин им препорача на сите да се откажат од сатанизацијата на кој било функционер, во која било земја, особено на Томислав Николиќ и додаде дека е потребно да се испочитува волјата на избирачите.
- Не е во прашање никаква драма, бидејќи во политиката често се случуваат промени на позициите. Драмата се случува само кај оние кои си заминуваат од власт, рече Кацин.
Тој потсети дека Николиќ „уште во далечната 2008 година бил на чело на Српската радикална партија“, но додаде дека тој на прифатил Спогодбата за стабилизација и асоцијација на Србија со ЕУ. - Тоа тогаш предизвика шок меѓу радикалите и дојде до поделби, а напредњаците денес се дел од проевропската Србија, рече Кацин.
- Она што мене ми е важно е дека Србија е парламентарна демократија и дека за се одлучуваат Собранието и владата. Владата на Србија е таа, која ќе преговара со Европската комисија за приближување и влез на Србија во ЕУ. Владата е таа која мора не со зборови, туку со дела да докаже дека може да добие датум за преговори. Затоа на Србија и е потребна силна и оперативна влада, порача Кацин.