Брисел, 10 септември 2012 (МИА) - Косовскиот министер за надворешни работи Енвер Хоџај изјави денеска за бриселскиот портал „ЕУопсервер“ дека завршувањето на надгледуваната независност на Косово значи и дека поделбата повеќе не е на дневен ред.
- Опцијата за поделба дефинитивно повеќе не се наоѓа на маса, изјави Хоџај, додавајќи дека српските општини на Косово ќе бидат интегрирани во локалниот систем.
Хоџај ја повика меѓународната заедница да изврши дополнителен притисок врз Србија да ги повлече своите „безбедносни и политички сили“ од северниот дел на Косово.
Тој изрази уверување дека Косово до крајот на годината ќе потпише Договор за стабилизација и асоцијација со Европската унија и да стане членка на Обединетите нации.
Интервјуто со Хоџај е објавено по повод затворањето на Меѓународната цивилна канцеларија во Приштина, што се толкува како крај на надгледуваната и почеток на целосната независност на Косово.