Сараево, 23 октомври 2012 (МИА) - Известувачот на Европскиот парламент за БиХ Дорис Пак изјави дека ЕУ моментално нема инструменти врз основа на кои би можела да го укине безвизниот режим за земји како БиХ или Србија.
- Сигурно е дека ваквите барања на неколку земји од ЕУ би можеле да имаат врска и со политичката ситуација во некои држави на Балканот. Ако го земеме примерот на БиХ, политичката ситуација е нестабилна, а економската се полоша. Луѓето се безнадежни, не чувствуваат дека властите работат за нив и затоа бараат азил во земјите на ЕУ. Тоа е разбирливо, но е неприфатливо, истакна Пак.
Европарламентарецот и искусен австриски политичар Ханес Свобода претходно оцени дека евентуалното укинување на визите за земјите од Западен Балкан би значело чекор назад за Унијата, која би требало да се стреми кон свое проширување.
- Министрите за внатрешни работи на земјите од ЕУ в четврток ќе расправаат за злоупотребите на безвизниот режим за земјите од Западен Балкан и неговото можно укинување, потврди за сараевскиот весник „Дневни аваз“ Микеле Черконе, портпарол на еврокомесарката за внатрешни работи.
Имајќи ги предвид информациите дека на овој состанок би требало да биде донесена негативна одлука за земјите, како што се БиХ, Србија, Црна Гора, Косово и Македонија, Черконе објасни дека не станува збор за никакво барање за укинување на безвизниот режим, туку овој проблем ќе биде предмет на дискусија на европските министри.