Будва, 24 јули 2013 (МИА) - Неколку учесници во Парадата на гордоста во Будва се повредени денеска, откако настана вистински хаос пред нејзиниот почеток, за време на нејзиното одржување и по завршувањето на првиот ваков настан во Црна Гора.
Противниците на Парадата фрлаа со камења, чаши и шишиња кон учесниците во поворката, а полицијата употреби димна бомба за да ги растерта напаѓачите, кои продолжија да фрлаат различни предмети кон полицајците.
Пред почетокот на Парада на гордоста дојде до судир меѓу полицијата и противниците на овој настан, при што полицајците употребија пендреци, а учесниците во протестот фрлаа со камења.
Поради судирите полицијата одлучи поворката да се одржи по скратена маршрута, а во нејзиното обезбедување учествуваа повеќе од 400 полицајци, меѓу кои и припадници на специјалните единици.
Повеќе од стотина противници на геј парадата, претежно млади лица, се собраа во близина на Стариот град и фрлаа со камења, шишиња и други предмети кон приврзаниците на ЛГБТ заедницата пред почетокот на Парадата. Насобраните противници на Парадата на гордоста скандираат навредливи пораки на сметка на ЛГБТ популацијата.
Полицијата претходно приведе неколку лица поради тоа што го гаѓале со јајца автобусот на припадниците на ЛГБТ заедницата и се обиделе физички да ги напднат.
Организатор на настанот е ЛГБТ Форумот прогрес, а претседателот на таа организција Здравко Цимбаљевиќ изјави претходно дека Парадата на гордоста во Будва ќе биде показател дали црногорското општество е во состојба да ги прифати и негува различностите.
Од ЛГБТ Форумот прогрес најавуваат дека до крајот на летото ќе биде одржана уште една Парада на гордоста.